ಆಗಸದಲ್ಲಿ ಅಣೆಕಟ್ಟು

ಮುಂಗಾರಿನ ಮೋಡಗಳಿಗೆ 

ಆಗಸದಲ್ಲಿ ಅಣೆಕಟ್ಟುಗಳ ಕಟ್ಟೋಣ !

ಮಳೆಗಾಲದಲ್ಲಿ ಮೈ ಕಾಯಿಸಿಕೊಂಡು 

ಪ್ರವಾಸಿಗರಂತೆ 

ಊರೂರು ಅಲೆದಾಡುವ 

ಮೋಡಗಳನು ಹಿಡಿದಿಡೋಣ !

ಗುಂಪು ಗುಂಪಾಗಿ ಬಂದು 

ಒಟ್ಟಿಗೆ ಗುದ್ದಾಡಿ 

ಕೊಚ್ಚುವ ಪ್ರವಾಹ ಇಳಿಸುವ 

ಕಿಡಿಗೇಡಿ ಮೋಡಗಳನ್ನು 

ಅಂಕುಶದಲ್ಲಿಡೋಣ !

ರಾಜ್ಯವಾರು ಜಿಲ್ಲಾವಾರು ಲೆಕ್ಕಮಾಡಿ 

ಅಕ್ಷಾಂಶ ರೇಖಾಂಶಗಳಿಗೆ 

ಮೋಡಗಳನ್ನು 

ಹಾಯಿ ದೋಣಿಗಳಲ್ಲಿ ಕಳಿಸಿ 

ಕರೆ ಕಟ್ಟೆಗಳನ್ನು ತುಂಬಿಸೋಣ !

ಕಾವೇರಿ ಗಲಾಟೆ 

ಮಿತಿಮೀರಿದಾಗ 

ಬೇಕಾಗುವ ಮೋಡಗಳನ್ನು 

ಪರ್ವತ ಶ್ರೇಣಿಗಳ ನೆರಿಗೆಗಳಲ್ಲಿ  

ಬಚ್ಚಿಡೋಣ !